اسكربت (عطاء بالاجبار) ♥️
- وبعدين أنا مش عارف أعمل إيه عشان ارضيكي
- لا أنت عارف
- يوووه تاني يا منه
- تاني وتالت ورابع
- يا منه يا حبيبتي انا ظروفي متسمحش بالشقة دي
- انا زهقت كل حاجه الظروف متسمحش
- زهقتي، دا أنتِ طلباتك كلها مجابه انا نسيت نفسي اصلا
- دا كله لي الي يسمعك كدا يقول طلبه المستحيل
- ايوا طلبه المستحيل لما تكوني عارفه ظروفي وتصممي علي شقه بالسعر دا يبقا بتطلبي المستحيل
- اسماء صحبتي شقتها في نفس الكومبوند وبيقولوا في أقساط أي رأيك نعمل زيهم
- اه قولتلي صحبتك أسماء، منه بصراحه كدا أنا تعبت كل يوم صحبتي جابت فون جديد عايزه زيه صحبتي جابت فستان كان نفسي فيه أنا خلاص جبت أخري أنا شغال ورديتين عشان اكفي طلباتك ومحرمكيش من حاجه بس خلاص
- يعني أي خلاص ي يوسف
- يعني يتعيشي معايا زي ما أنا مليش دعوه بحد يا كل واحد يروح لحاله
- كدا يا يوسف ماشي
(قامت مشيت معرفش ازاي قولت كدا بس أنا تعبت شغال ورديتين مبلحقش انام عشان اسعدها وارضيها مستعد أعمل أي حاجه عشانها بس هي مش شايفه غير صحابها بيجيلهم اي وبيعملوا أي وآخر حاجه بعد مخلاص اشترينا الشقه وعجبتها جايه تقولي نبعها ونشتري غيرها عشان صحبتها اشترت شقه 3 اوض بدل 2، بس مقدرش علي زعلها قومت روحت لمحل هدايا واشتريت بوكس في الشيكولاته الي بتحبها والنوته الي كان نفسها فيها وجواب بعتذر فيه عن كلامي ووصيت علي بوكيه ورد بمبي زي ما بتحبه ورحتلها، رنيت كتير مش بترد بس عارف هي هترد ازاي)
- منه اطلعي بره البيت أنا جايبلك حاجه نفسك فيها
وفعلا يدوب شافت الرساله ولقيتها فتحت علي طول
- كدا يا مونمون مش بتدري عليا
- عايز أي يا يوسف
- عايزك ي حبيبتي تكوني بخير
- بعد أي بقا
- خودي الاول
- اي دا هو دا الانت جايبه
- ي ستي افتحي البوكس الاول، وأنا همشي عشان اتأخرت
أخدت البوكس وأنا مشيت حاسس أني مبسوط ومرتاح عشان هي فرحانه، سمت رنت الفون عرفت أن هي لان مخصص الرنه دي بالذات ليها عشان لما أكون في الشغل أعرف ارد عليها
- مونمون قلبي
- اي دا أنت جاي عشان خاطر النوته دي
- هي معجبتكيش ولا اي
- لا
- بس أنتِ الي كنتِ مختارها الأسبوع الفائت
- اديك قولت الأسبوع الفات، في واحده تانيه أختي جبتها عجباني
- حاضر ي منه خاليها أول الشهر وهجبلك الانتِ عيزاه
- لسا هستني
- كلها اسبوع ي مونمون
- طيب هتخرجني فين بكرا
- بكرا، هو بكرا اي
- بكرا الخميس
- منه أنتِ عارفه أن بخلص شغل متأخر خاليها الجمعة
- يوووه، ماشي سلام
بصيت للفون أول مره أحس الإحساس دا، أنا متعود علي كدا منها لما تتعصب بس المره دي اديقت هو انا مهما اعمل لي مش بيعجبها ومع أن بحبها جدا ونفسي تفهم دا مشيت علي البحر مكاني المفضل وقعدت افكر مع نفسي شويه لان كنت محتاج دا
من حظي تاني يوم خلصت شغلي بدري قولت اعمل ليها مفاجأة وأروح اعزمها علي ايس كريم الفانيليا زي بتفضله كنت عارف هي دائما بتعقد فين مع صحابها ورحت الكافيه ورنيت وانا بره عشان تخرج بعد 5 مكالمات ردت
- اخيرا اي يابنتي أنا قولت أنتِ نايمه ولا حاجه
- اي يا يوسف ما أنت عارف اني مع صحابي
- طيب ي حبيبتي هتتأخري
- شويه، يوسف أقفل دلوقتي وهكلمك كمان شويه
مستنتش تسمع كلامي وحسيت بهبددت الفون علي الطربيزه بس شكلها نسيت تفصل المكالمه وقبل ما انا اقفل سمعت صحبتها بتقول.....
*******************************************
زي ما يكون نسيت تقفل المكالمة عشان يكون إثبات لقلبي عن إلي هو مش يراضي يصدقه كانوا بيقولوا:
- أي يا بنتي أنتِ بتنفضيله ليه
- ونبي اسكتي دا أنا اتخنقت، والموضوع بقا بايخ جداً
- أمرك غريب يا منه طيب ما تسبيه وتريحي دماغك بدل كل يوم ما أنتِ زهقانه منه كدا
- لا أنتِ عايزه أسماء تفرح فيا، وبعدين أهو بيعمل إلي الأنا عيزاه وميقدرش علي زعلي
- عيب يا منه تتكلمي كدا عنه قدمنا
- عيب ليه، دا هو العيب
ضحكوا كلهم علي كلامها، ضحكوا عليا خلتني نكته ليهم لا وشكلي نكتتهم من زمان، قفلت الفون ومقدرتش أكمل مش عايز أنزل من نظر نفسي اكتر من كدا، ما أنا السبب أن أنزل من كرامتي لما كنت بقبل بكل حاجه هي عيزاها، فضلت ماشي معرفش قد اي بس لقيت نفسي واقف عند مكاني المفضل البحر بحس أنه بيسحب مني همومي
بعد أسبوع غياب مرنتش عليا ولا مره ولا هان عليها تسأل تطمن أنا حصلي اي، دا أنا كنت في عز شغلي لازم اطمن عليها كل ساعة، بصراحه سهلت عليا كتير بتصرفها دا، وشالت كل الحلو الي كان موجود ليها أو بمعني أصح كنت بحليه عشانها
بعتلها أن مش هينفع نكمل تاني يوم لقيت الدهب وكل الهدايا الي مكنتش بتعجبها إنما الي عجبها خدتها، في الوقت دا عرفت ان كنت معمي واختياري غلط من البداية، مستغربتش لما عرفت بعد أسبوعين أنها اتخطبت لجارهم الي كانت دائما بتقرني بيه في كل حاجة من بعدها ومشغلتش نفسي بأخبارها
عدي شهر شهرين تلاته، ودلوقتي عدي سنه واربع اشهور مش ندمان انا بحمد ربنا، بعد زن من أمي قررت اسمع كلامها بما أن خلاص خلصت الشقه خلصت وجهزت عفشي والحمدلله محضر فلوس الفرح، أمي كانت شايفه بنت قربيتنا من بعيد وتوكلت علي الله انهارده رايحه اقعد معاها
كنت عايز اخد بوكيه ورد بس خوفت لتستقل بيه مردتش وقولت أروح فاضي ولو حصل نصيب ابقا أشوف بتحب اي، كانت هاديه ملامحها لبسها ضحكتها، بس الخوف مسيطر عليا ليكون بعد الهدوء دا عاصفة من الطمع، قعدنا مع بعض واخوها الصغير معانا قررت أعرفها حياتي عشان نبنيها صح من البداية:
- بصي ي فرح أنا حابب أعرفك انا مين اكتر عشان تكوني فهماني، أنا يوسف عندي ٢٧ سنه شغال في مول ساعات كتير بشتغل ورديتين وربنا قدرني الحمدلله وعرفت اشتري شقه جنب المول، انا عرفتك حياتي ومقدرتي لان مش هعرف اعملك اكتر من طاقتي وعمري ما هيكون معايا وهبخل عليكي وان شاء الله مش هحرمك من حاجه بس مش هيكون عطاء بالاجبار لا هيكون بموده بيني وبينك
- خلصت
- ايوا، قوليلي أنتِ بقا
- أنا عندي طلب
أول ما قالت كدا حسيت بخيبت أمل هي زيها كانت كل حاجه عندها طلبات لما طال سكوتي حسيتها اتوترت
- لو في استطاعتي هنفذه
- أنا عرفت أنك مخلص الشقه وكدا
- ايوا الحمدلله
- طيب عندي طلب واتمني تنفذه
- اي هو
- الفرح
- مالو عايزه في قاعه معينه
- لا مش عايزه فرح
- نعم
- ليه منروحش أنا وأنت نعمل عمره بفلوس الفرح، استني قبل ما ترد اسمعني للآخر
- اتفضلي
- كدا كدا انا هعمل حنه وصحابي معايا وانت كمان ممكن تعمل كدا يعني صحابك يوم الحنه برده، يوم الفرح نكتب الكتاب ونطلع علي الطياره أنا نفسي اوي ابتدي حياتي واحنا بنقرب لربنا ونفسي توافق
سكوتي مكنش اعتراض كنت متفاجئ متوقعتش أن دا تفكيرها بس فرحت جدا لان مين منفسوش يبتدي حياته في بيت الله
- انت ساكت لي، لو مش عايز خلاص انا مش حابه اديقك
- هو حد يدايق من كدا برده
- يعني اي
- يعني علي بركه الله ي زوجتي المستقبليه
في الطياره
- مبروك يا عروسة
- الله يبارك فيك ي يوسف، ربنا يقدرني واسعدك يارب
- أن شاء الله يا فرحة حياتي
انهارده عيد جوزانا الخامس، خمس سنين في حب وسعاده بوجودها في حياتي، ربنا رزقنا بـ عبدالله اربع سنين وخديجة سنتين، والحمد لله فتحت محل في المول خاص بيا بعد ما فرح باعت الدهب ووقفت وجنبي ساعتها لما شوفت هي بتعمل اي عشاني كان لازم أول ربح من المحل اعوضها روحت جبت سلسله دهب علي شكل فراشة لأنها بتحب الحاجات الرقيقه دي وجحزت في رحله لشرم أربع أيام، الحمدلله على اختيار ربنا ليا الحمدلله عليها ♥️
- فرح
- نعم يا بو العيال
- قلب أبو العيال بحبك يا أم العيال
إرسال تعليق